Нийслэлийн хүн амын хүнсний хангамжийг нэмэгдүүлэх, үнийг тогтворжуулах зорилготой үйлдвэрийн аргаар боловсруулсан махыг зах зээлийн үнээс хямдаар худалдаалах болсон. “Саян-Уул” ХХК-ийн гаргасан энэхүү санал санаачилгыг нийслэлээс дэмжин дүүргүүдийн нутаг дэвсгэрт хүн амын нягтрал, зах зээлийн эрэлт хэрэгцээг тооцон гаргасан долоон түр байршилд махны төрөлжсөн худалдааны цэг байгуулахаар болжээ. Тодруулбал, Хан-Уул дүүргийн 19-ийн үйлчилгээний төв, Сонгинохайрхан дүүргийн Цамбагарав худалдааны төвийн өмнөх талбай, Баянзүрх дүүрэг “Шинэ Монгол” сургуулийн хойд талд эхний цэгүүдийг байрлуулжээ. Эдгээр цэгт үйлдвэрийн аргаар боловсруулсан мах махан бүтээгдэхүүнийг “Хүртээмжтэй хүнс-баталгаат байдал” дэд хөтөлбөрийн дагуу “Хүчит шонхор” захын үнээс 500-1000 төгрөгөөр хямдаар худалдаалах юм байна.