АНУ-ын мэргэжлийн сагсан бөмбөгч асан Деннис Родман Пхеньянаас Бээжинд очоод хэвлэлийнхнээс уучлалт гуйсан тухай ВВС мэдээлэв. Деннис Родман “Би Ерөнхийлөгч биш, Элчин сайд биш. Би зүгээр л спортоор эв нэгдлийг бий болгож болно гэдгийг дэлхий дахинд харуулахыг хүссэн юм” хэмээн хэлсэн байна. Түүний хэлснээр тэр ямар нэгэн муу зүйл хийгээгүй гэнэ. Америкийн хүний эрхийг хамгаалагчид Д.Родманыг Хойд Солонгост очиж, удирдагч Ким Чен Иртэй уулзаж байгааг буруутгасан. Түүнийг АНУ-аас урваж байна гэж үзэх хүмүүс ч байгаа аж. Тиймээс Д.Родман “Би эх орондоо хайртай. Америкт хайртай. Би хэзээ ч эх орондоо хохирол учруулж байгаагүй” хэмээн тэмдэглэлээ. Тэрчлэн “Хойд Солонгосын үзэгчдийн өмнө сагсан бөмбөг тоглохдоо баяртай байсан. Умардын тамирчид болон NBА-гийн мэргэжлийн сагсанбөмбөгч асан тамирчдын хооронд тоглолт зохиохдоо бүх хүнд сайн зүйл хийхийг хичээсэн” гэсэн байна.