АНУ-ын төв хэсгээр өнгөрсөн мягмар гаригаас хойш ихээхэн хүйтэрч, хүйтэн агаарын урсгал зүүн зүг рүү чиглэсэн нь тус улсын бараг гуравны хоёрт нь хагас метр хүртэл гүн цас орч, дахин хахир хүйтэн цаг агаартай учирна гэж ус цаг уурын албанаас нь мэдээлжээ. Хүйтний эрч чангарснаар энэ гамшигт хамгийн их нэрвэгдсэн Канзас мужийн захирагч “онц байдал” зарлаж, олон албан байгууллага, сургууль үүдээ хаахад хүрчээ. Канзас болон хөрш Миссури мужийн эрх баригчид иргэдэд аль болох гэртээ байхыг зөвлөсөн бол Үндэсний цаг уурын албанаас замд аялахад тун хүнд нөхцөл бүрдсэнийг олон нийтэд сануулсан байна. Цаг агаарын нөхцөл хүндэрснээс Канзас мужид хоёр хүн ослын улмаас амь насаа алдаж, Үндэсний гвардийнхан байлдааны Humvees машинаараа замд цасанд суусан хүмүүст эмнэлгийн тусламж болон онцгой албаныхныг хүргэн тусалж байна.
АНУ-д өнгөрсөн мягмар гаригт нийт 9500 гаруй нислэг хойшилж, 1800 нислэгийг цуцлахад хүрсэн аж. Өчигдөр шуурга бүхий хүйтэн агаарын урсгал тус улсын зүүн эрэгт хүрсэн байна. Улмаар эргийн дагуух чийглэг агаар орчноо мөсөн хуягаар хучиж иргэдэд ихээхэн хүндрэл учруулж байна. АНУ-д цаг агаар хүндэрснээс халаалтын зориулалтаар ашигладаг шингэн түлшний эрэлт нэмэгдэж, биржүүдэд газрын тосны үнэ бага зэрэг нэмэгджээ. Түүнээс гадна цаг агаарын нөхцөлөөс хамааран автомашины борлуулалт бага хэмжээгэээр өссөн байна.


Орост
ОХУ-ын Ростов мужид өнгөрсөн амралтын өдрүүдэд мөн ихээхэн хүйтэрч, их хэмжээний цас орсноос хотын иргэд болон замд явсан жолооч, аялагчид барьц алдахад хүрсэн байна. Тус мужийн ихэнх нутгаар өдөртөө -8- 13С, шөнөдөө -15-аас -20С заримдаа -26С хүрч байна. Энэ ердийн үеийнхээс 10 орчим градусаар хүйтэн байгаа юм. Бүх зам мөстөж, цасан хунгар үүссэнээс тус хотынхонд хүнсний хангамж тасалдаж байв. Тухайлбал, өнгөрсөн амралтын өдрүүдэд зарим дүүрэгт талх олдохгүйгээс их хэмжээний дараалал үүсч, олон хүнийг бухимдуулж байв. Мөн мужийн нутгаар өнгөрсөн зам дагуух хоолны газрууд үнээ хэд дахин нэмсэн нь цасанд боогдсон хүмүүсийг ихээхэн бухимдуулсныг Оросын мэдээллийн хэрэгслүүд мэдэээлж байсан юм. Мөн Кемерово мужид энэ долоо хоногийг дуустал цаг агаар эрс хүйтэн хэвээр байж, -40С хүртэл хүйтэн байгаа юм. Цаг агаарын нөхцөл байдалтай холбоотойгоор аврагчид зам дээр мөс, цасан хунгар бий болсныг санууллаа. Иргэдэд аль болохоор хол зам гарахгүй, гэртээ байж, гадуур явахдаа зэргэлдээ орших дэлгүүр үйлчилгээний газруудад орж дулаацаж байхыг зөвлөжээ. Түүнчлэн манай улстай хил залгаа Алтайн хязгаарт маргаашийг дуустал хүйтэн хэвээр байж, агаарын хэм -33-38С, зарим үед 40-43С хүрэх аж.