ОХУ Украин дахь Европын аюулгүй байдал, хамтын ажил­лагааны байгууллагын шинэ төлөөлөгчийг үүсээд буй үл ойлголцлыг зогсоож эвлэрүүлэх яриа хэлэлцээ хийхэд идэвх чармайлт гаргана гэдэгт найдаж буйгаа Гадаад харилцааны яамаараа дамжуулан мэдэгдлээ. Европын аюулгүй байдал, хамтын ажиллагааны байгууллагын тэргүүн, Швейцарийн Ерөнхий­лөгч Дидир Бурхалтер Украины шинэ Ерөнхийлөгч Петро Порошенкогийн хүсэлтээр тус улс дахь шинэ төлөөлөгчөөр Хеди Таглиавинийг томилсон. Украины шинэ Ерөнхийлөгч Петро Порошенко өнгөрөгч бямба гариг буюу энэ сарын 7­нд Ерөнхийлөгчийн тангаргаа өргөсөн бөгөөд энэ ёслолд оролцсон Дидир Бурхалтер Петро Порошенкотой уулзаж ярилцах үеэр П.Порошенко дээрх хүсэлтээ тавьжээ. Тиймээс Дидир Бурхалтер нутаг нэгт Хеди Таглиавиниг ОХУ Украины асуудлаарх Европын аюулгүй байдал, хамтын ажиллагааны байгууллагын Киев дэх төлөөлөгчөөр томилжээ. Үүнээс гадна ОХУ Украины хооронд үүсээд буй нөхцөл байдлаас үүдэн барууны орнууд Европын Холбоо, АНУ, ОХУ, Украин гэсэн дөрвөн талт уулзалтыг өнгөрөгч дөрөвдүгээр сарын 17­нд Швей­ царийн Женев хотод зохион байгуулж нааштай үр дүнд хүрсэн юм. Тэгвэл ОХУ энэ уулзалтын үеэр баталсан төлөвлөгөөг дэмжин ажиллахаа илэрхийлээд, шинэ төлөөлөгч Хеди Таглиавинийг энэ төлөвлөгөөг хэрэгжүүлнэ гэдэгт итгэж байна гэв. Уг төлөвлөгөөний хамгийн чухал тохиролцоо нь Украины улс төрийн болон бие даасан бүх хүчинг оролцуулсан яриа хэлэлцээ хийх юм. Мэдээж ийм хэлэлцээ Украинд үүсээд буй улс төрийн хямрал, хүчирхийллийг зогсоох нь дамжиггүй. Нөгөөтэйгүүр, Европын аюулгүй байдал, хамтын ажиллагааны тэргүүн, Швейцарийн Ерөнхийлөгч Дидир Бурхалтер нутаг нэгт нэр хүндтэй дипломатч Хеди Таглиавинид тодорхой үүрэг даалгавар өгсөн нь гарцаагүй. Хеди Таглиавини нь Өмнөд Осетэд болсон зэвсэгт мөргөлдөөний шалтгааныг тодруулах Европын аюулгүй байдал, хамтын ажиллагааны байгууллагын комиссын даргаар ажиллаж байснаас гадна 2010 онд Украинд болсон Ерөнхийлөгчийн сонгуульд хяналт тавих дээрх байгууллагын төлөөлөгчдийн ахлагчаар ажиллаж байсан туршлагатай нэгэн. Гэхдээ 2008 онд ОХУ Өмнөд Осет, Абхазыг өмөөрч Гүржийн эрх баригчидтай таван өдрийн дайн хийсний улмаас Өмнөд Осет, Абхаз мужууд Гүржээс салан тусгаарлаж, Гүрж­ Оросын харилцаа муудсан юм. Үүний дараа ОХУ тэргүүтэй зүүн Европын хэд хэдэн орон Өмнөд Осетийг бие даасан улсаар хүлээн зөвшөөрсөн. Үүнтэй адилаар Украины зүүн нутгийн зарим хэсгийг ОХУ салгах, цаашлаад тусгаар улсаар хүлээн зөвшөөрөх, бүрэлдэхүүндээ нэгтгэж магадгүй гэсэн хардлага Киевийн эрх баригчид болон барууны холбоотнуудад бий. Ямартай ч, Москва болон Киев дайныг хүсэхгүй байгаагаа мэдэгдсэн. Үүнээс өмнө ОХУ Украины хилийн ойролцоо багагүй тооны цэргийн хүч бөөгнөрүүлсэн ч үүнийгээ татсан. ОХУ­ыг баруун хилийн ойролцоо цэргийн хүч төвлөрүүлж эхэлсний дараа Украины Ерөнхий сайд Арсений Яценюк Нью­Йорк хотноо зохиосон ОХУ­ Украины хямралын талаарх НҮБ­ын Аюулгүйн зөвлөлийн шуурхай хуралдааны үеэр Москвагийн эрх баригчдыг олон улсын гэрээ конвенц зөрчиж байна хэмээн шүүмжлэхийн сацуу Украин Улс ОХУ­ын зэвсэгт түрэмгийллийн золиос болж байгааг сануулсан. Үүгээр ч зогсохгүй Аюулгүйн зөвлөлийн хуралдаанд сууж байсан ОХУ­ын төлөөлөгчид хандан ОХУ дайн хүсч байгаа эсэхийг лавлажээ. Үүний хариуд НҮБ дахь ОХУ­ ын суурин төлөөлөгч Виталий Чуркин “ОХУ Украинтай адил дайныг хүсэхгүй байгаа” гэсэн юм. Украины Ерөнхий сайдын энэ мэдэгдлээс гадна Украины Батлан хамгаалахын дэд сайд Леонид Поляков “ОХУ газар нутгаа Украинаар тэлэхийг санаархаж байна” гээд Луханск, Донецк зэрэг мужийг Гүржийн Өмнөд Осет, Абхазын адил бүрэлдэхүүнээсээ алдахгүй байхад барууны холбоотнуудыг ямар нэгэн зүйл хийхийг хүссэн юм. Юутай ч, Европын аюулгүй байдал, хамтын ажиллагааны байгууллагын цахим хуудаст мэдээлснээр Хеди Таглиавини ОХУ Украины хооронд маргааныг зохицуулахаар хэдийнэ Киевт хүрэлцэн очжээ. Тэгвэл өнгөрөгч дөрөвдүгээр сарын 17­нд Женев хотноо болсон дөрвөн талт уулзалтаар барууны холбоотнууд болон ОХУ Украин дахь хүчирхийллийг зогсоохоос гадна мөргөлдөөнд оролцсон бүх хүмүүст өршөөл үзүүлэх цаашлаад эрх баригчид болон бие даасан дэмжигчид тэр дундаа Украин дахь орос хэлээр ярьдаг бүс нутгуудын тэмцэгчдийн хооронд энхийн яриа хэлэлцээ явуулах нь зүйтэй гэж үзжээ. Өнгөрөгч долоо хоногт ОХУ­ын Гадаад харилцааны яамны Хүний эрхийн комиссар Константин Долгов “ОХУ дөрвөн талт уулзалтаар баталсан төлөвлөгөөг дэмжин ажиллана. Мөн Украины эрх баригчдыг зүүн нутагт явуулж буй цэргийн ажиллагаагаа зогсооно гэдэгт итгэж байна” гэж мэдэгдсэн. Эргэн сануулахад, Украины эрх баригчид өнгөрөгч дөрөвдүгээр сарын дунд үеэс орос хэлээр ярьдаг голдуу зүүн нутгууд цэргийн тусгай ажиллагаа явуулж, бие даасан улс байгуулах хүсэлтэй хөдөлгөөнүүдтэй тэмцэж эхэлсэн юм. Хэдий тийм ч тэдгээр хөдөлгөөн Луханск болон Донецкийн ардын бүгд найрамдах хэмээн өөрсдийгөө зарлаж Украинаас салан тусгаарлахаар тэмцэж эхэлсний улмаас хүчир хийлэл улам гаарсан. Мөн өнгөрөгч тавдугаар сард Шинэ Орос нэрийн дор нэгдсэн хэсэг бүлэг хүн хүчирхийллийн гал дээр тос нэмсээр байгаа аж. Одоогийн байдлаар хүчирхийллийн улмаас олон зуун хүн, түүний дотор цөөнгүй энгийн иргэн амь насаа алдаад байна.