Хойд Солонгос ирэх аравдугаар сард нээлтээ хийхээр төлөвлөж буй “The Interview” /Ярилцлага/ киног хэрвээ дэлгэцэнд гарвал АНУ-ыг өршөөхгүй гэж мэдэгдлээ. “Колумбиа Пикчерс” кинокомпанийн бүтээсэн уг киноны сурталчилгаа / трейлер/ саяхан цацагдсан агаад кинон дээр АНУ-ын хоёр нэртэй сэтгүүлч Ким Жон Унтай ярилцлага хийх нэрийдлээр Пхеньянд газардаж улмаар “Си- Ай-Эй” /АНУ-ын тагнуулын төв газар/-ийн тушаалыг биелүүлж түүнийг хөнөөдөг тухай гардаг аж.

Хойд Солонгосын Гадаад харилцааны яамны төлөөлөгч Холливудын дээрх киног дайн өдсөн бүтээл хэмээн тодорхойлж аравдугаар сарын 10-нд нээлтээ хийвэл АНУ-аас хатуу хариу авахаа амлав. Тулаант, инээдмийн төрлийн энэ кинонд Холливудын нэртэй жүжигчид болох Жеймс Франко, Сет Роген нар тогложээ.