Өнөөдөр манай эрүүлийг хамгаалахын салбарт ус агаар шиг хэрэгтэй зүйл бол эмнэлгийн байгууламж, орчин үеийн шилдэг технологи. Энэ бүгдийг өрөндөө баригдсан төр бүгдийг амжуулна гэдэг ёстой үлгэр. Тэгээд ч олон жил ярьсаар ирсэн ч ажил болгосон нь хангалттай бус. Тэгвэл хөрөнгө оруулалт саарч, үндсэндээ гацаанд ороод байгаа энэ үед “Ачлал трейд”-ийнхэн Японы хөрөнгө оруулалттайгаар орчин үеийн тоног төхөөрөмж бүхий “Ачлал Оточ” эмнэлэг барихаар төсөл боловсруулжээ. Үүнийгээ нийслэлийн Засаг дарга Э.Бат-Үүлд танилцуулснаар Баянзүрх дүүргийн 18 хорооны 13 дугаар хороололд газар олгосон тухай бид мэдээлж байсан.
      Учир нь монголчууд бид монголдоо оношлогддоггүй, эмчлэх боломжгүй өвчнийг гадагшаа өндөр зардлаар явж эмчлүүлдэг. Гэхдээ дийлэнх нь зардал мөнгийг нь дийлэхгүй, амь насаа алдах тохиолдол ч олон байдаг. Харин “Ачлал-Оточ” эмнэлэг нь дэлхийн шилдэг технологи бүхий, олон улсын стандартад нийцсэн эмнэлгийн төсөл боловсруулж, нийт монголчууддаа үйлчлэхээр зориг шулууджээ. Энэ бүгдийг өнгийж харвал үнэхээр монголчуудад маш чухал хэрэгтэй зүйл гэдэг нь бүгдээс илт.

      Элдэв хорт хавдар газар авч, хэчнээн зуун сая төгрөгөөр гадагшаа явж эмчилж байгаа энэ үед монголдоо бага зардлаар эмчлээд эдгээх боломжийг бүрдүүлж байна гэсэн үг. Тиймээс хотын дарга Э.Бат-Үүл ийнхүү нүдээ олсон зүйл хэмээн дүгнэж газар олгосон бололтой. Тодруулбал, нийгмийн сайн сайхны төлөө, эрүүл энхийн үйлсэд эрдэм мэдлэг, хөрөнгө зоорио зориулж байгаа хамт олныг Төрийн зүгээс дэмжсэн хэрэг л дээ.
       Гэтэл сайн юманд саар мундахгүй гэгчээр гэнэт иргэн С.Энхцэцэг гэгч гарч ирээд “бидний барьж байгаа барилгын нарыг хааж барилга барилаа. Энэ нь хууль бус” хэмээн баахан үндэслэл зохиож зарга үүсгэсээр байгаад тус барилгын үйл ажиллагааг зогсоож дөнгөжээ. Уг нь “Ачлал-Оточ”-ийн барилга нь эмнэлгийн зориулалтаар, нийслэлийн Засаг даргын зөвшөөрлөөр, Хот төлөвлөлтийн газрын дүгнэж олгосноор баригдаж байгаа объект юм. Тодотговол, ямар нэгэн хууль зөрчөөгүй байхад ийн үйл ажиллагааг нь зогсоожээ. Нийгмийн сайн сайхны төлөө, хүн ардынхаа эрүүл мэндийн төлөө сайн үйл бүтээж байгаа хууль ёсны үйл ажиллагааг ганцхан иргэн зогсоочихно гэж үгүй хэмээн учир мэдэх нэгэн хэлж байгаа юм. Харин баримт сөхвөл иргэн Сайнжаргалын Энхцэцэг нь БЗД-ийн 18 дугаар хорооны 13 дугаар хороололд агуулахын зориулалтаар 160 квадрат метр талбайг олгосон бүртгэлийн гэрчилгээ байна. Агуулахын зориулалтаар шүү.

      Харин иргэн С.Энхцэцэгийн одоо босгож буй барига нь агуулахын бус лавтай найман давхар хана туурга босгочихсон байна лээ. Хамгийн гол нь “Ачлал-Оточ” эмнэлэгт төрөөс олгосон эрх ашгийг хөндөж, нийгмийн сайн сайхны төлөө бүтээн байгуулж байгаа хууль ёсны үйл ажиллагааг зогсооно гэдэг нь хэний ч сонирхлыг татна. Гэтэл баттай эх сурвалжийн хэлж байгаагаар бол иргэн С.Энхцэцэг гэгчийн ар талд шүүхийн томоохон албан тушаалтан байдаг аж. Тиймээс л төрийн эрх, хууль цаазын дээгүүр ийнхүү дураар тонгочиж байгаа бололтой.
       Өнөөдөр бид Монголдоо төгс төгөлдөр эмчилгээ хийлгээд эдгэрэх боломж дүүрэн биш. Манайд оношилж чадахгүй, эмчилж болдоггүй өвчин тусах нь элбэг. Тиймээс бид элдэв хандив тусламж гуйж байдгаа барж гадаадад явж оношлуулж эмчлүүлдэг. Харин “Ачлал-Оточ” эмнэлэг нь энэ л зовлон зүдгүүрийг арилгахын төлөө бүхий л зүйлээ зориулсан нь төслөөс илт харагдана лээ. Дэвшилтэт технологиороо дэлхийд алдартай япончуудтай хамтарч байгаа нь ч санаандгүй хэрэг биш. Тиймээс нийт ард олныхоо өмнөөс сэтгүүлчид бид ч “Ачлал-Оточ”-ийг дэмжиж ажиллахаа дашрамд мэдэгдээд байсан билээ. Тийм ч үүднээс үүнийг ахин бичиж сууна.
      Дэмжиж байгаа учраас “Ачлал трейд”-ийн М.Билэгт гэх эмэгтэйд бид нийт монголчуудынхаа өмнөөс талархах ч ёстой, дэмжих ч хэрэгтэй. Гэтэл үйл ажиллагааг нь зогсоож дарамт үзүүлнэ гэдэг байж боломгүй зүйл. Ерөөсөө манай төр бүх зүйлд бизнес, хувийн зорилгоор оролцдгийн нэг жишээ ч энэ байж магадгүй юм. Төр зохицуулалтыг нь хийгээд газрыг нь олгоод өгч байхад нэг эрх мэдэлтэн шүүх засаглалаар далайлган зогсоогоод байх юм бол яаж ажил урагшаа явах вэ. Яаж улс орон хөгжих вэ. Төрөөс газрыг нь олгоод, хууль эрх зүйн хүрээнд үйл ажиллагаа явуулж байгаа газрын ажлыг зогсооно гэдэг байж боломгүй зүйл. Тэгээд өөрсдөө чадахгүй байж, чадаж байгаа нэгнээ дэмжээд өгөхөд яадаг байна вэ.