Харин чуулга уулзалтын хоёр дахь өдөр буюу өнөөдөр нэлээн онцлох үйл явдлаар дүүрэн болж өнгөрлөө.  Тухайлбал, Монгол Улсын Хөрөнгө оруулалтын газар болон БНХАУ-ы ӨМӨЗО-ны Худалдааны танхим хоорондын хөрөнгө оруулалтын хамтын ажиллагааны санамж бичигт газрын үсэг зурахын зэрэгцээ БНХАУ болон Монголын 12 компани хамтран ажиллах гэрээ байгуулав. Дээрх санамж бичгийн хүрээнд Монгол Улс болон ӨМӨЗО-нд хөрөнгө оруулалтыг татах шинээр бизнес эрхлэн болон бизнесийн цар хүрээгээ өргөтгөхийг хүссэн компаниудыг дэмжиж, шинэ боломж гарцуудыг нээж өгөх, харилцан туршлага судлах, хөрөнгө оруулагчдад тулгарч буй асуудлуудыг багасгах чиглэлээр хамтран ажиллах юм.
Энэ өдөр Хилийн боомтуудын хөгжлийн асуудлаар баримтлах бодлого, төлөвлөлт, Чөлөөт бүсүүдийн хөгжил сэдвээр илтгэл тавигдлаа. Мөн Замын-Үүд эдийн засгийн чөлөөт бүсийн Хөрөнгө оруулагчдын зөвлөлийн танилцуулгыг хийсэн юм. Мөн энэ үеэр Монгол Улсын  “Замын-Үүд” эдийн засгийн чөлөөт бүсийн Хөрөнгө оруулагчдын зөвлөл болон БНХАУ-ын ӨМӨЗО-ны худалдааны танхим, боомтын албан газар хооронд хамтран ажиллах санамж бичиг байгууллаа.  
Ийнхүү “Монгол Улс-ӨМӨЗО хөрөнгө оруулалтын чуулга уулзалт-2014” амжилттай болж өндөрлөсөн бөгөөд хөрөнгө оруулагчид, оролцогчид дээрх уулзалтыг цаашид зохион байгуулах, үүнээс гарах үр дүнг эерэгээр хүлээн авч байна хэмээн онцолж байлаа.  Түүнчлэн Хөрөнгө оруулалтын газрын дарга С.Жавхланбаатар “ ӨМӨЗО-ын хөрөнгө оруулагчидтай хийсэн уулзалт маш үр дүнтэй боллоо гэж бодож байна. Бид хэд хэдэн  асуудлаар санамж бичигт гарын үсэг зурлаа.  Дээрх ажил маань удахгүй биелэлээ олж, үр дүнгээ өгнө хэмээн итгэж байна” гэсэн юм.