“Ачлал трейд” компанийхан 13 дугаар хороололд хавдарын оношлогоо, эмчилгээний иж бүрэн үйлчилгээ үзүүлэх “Ачлал-оточ” эмнэлэгийг барьж эхлүүлсэн. Тус цогцолбор эмнэлэгийг эрүүл мэндийн үйлчилгээгээрээ

дэлхийд гайхагддаг япончуудын дэмжлэг, оролцоотойгоор монголчуудын дунд сүүлийн үед ихээр элбэгших болсон элдэв өвчин ялангуяа, хавдарын төрөл бүрийн эмгэгийг эмнэж, эмчлэх зорилгоор хийж буй аж.
Зундаа шороогоор шуурч, өвөлдөө утаагаар багширдаг бас хатуулаг ихтэй ус хэрэглэдэг нийслэлийн хүн амын дунд уушги, элэг, ходоод, дотрын элдэв хавдарын өвчин нэмэгдэж байгаа нь Улаанбаатарчуудын санааг ихэд түгшээх болсон. Хотын дарга нар ч энэ асуудалд анхаарал хандуулж, санаа тавьж Э.Бат-Үүл дарга зөвшөөрлийг нь олгож, Д.Баттулга дарга эрүүл мэндийн байгууллага байгуулах ажлыг түргэвчлэхийг дэмжиж байгаа.
“Ачлал-оточ” эмнэлэг байгуулагдчихвал манай хотын иргэд төдийгүй нийт монголчууд маань хаа холын Япон, Солонгос, Хятадын Бээжин явж эмчлүүлэх шаардлага байхгүй болно. Ядаж л Эрээний эмнэлэгт очиж оношлогоо хийлгэх зардлаараа Улаанбаатар хотдоо иж бүрэн шинжилгээ хийлгээд эмчлүүлдэг болчихно гэсэн үг.
Харамсалтай нь тэдний энэхүү зөв санаалчлага, эрүүл мэндийн бүтээлч ажлыг зориуд таслан зогсоохыг оролдож, барилгын эргэн тойрны байрны оршин суугчдын нэр барьсан хаа хамаагүй нөхдүүдийг турхирч, цаашлаад хууль шүүхийг байгууллагыг ашиглан идэвхитэй нөлөөлж, барилгын ажлыг нь зогсоогоод байгаа гэнэ. Манай улсын уналттай, хоцрогдсон цөөн хэдэн салбарын толгойд нь эрүүл мэндийн салбар байгаа гэдгийг дарга даамлаасаа эхлээд жирийн иргэн хүртлээ монгол хүн бүр ярьдаг. Тиймээс энэ салбарт зоригтой хөрөнгө оруулалт хийж байгаа “Ачлал”-ын ажлыг дэмжихийн оронд, чөдөр тушаа болж, янз бүрээр шахаж шантаажлах ядмаг аргаа цөөвтөр хэдхэн төрийн албан тушаалтан, тэдний аялдан дагагсад, жижигхэн тархитай бизнесийнхэн больчихвол таарна.
Улаанбаатарт маань “Сонгодо”, “Гранд мед”, “Ачтан”, “Гурван гал” шиг бас  төрөлжсөн нэг эмнэлэг нэмээд гараад ирвэл монголчууд бидэнд л хэрэгтэй байх. Ядаж л Эрээн явдаг мөнгөөрөө эх орондоо эмчлүүлдэг болвол сайхан бишүү.