А.Яценюк тэргүүтэй Украины шинэ Засгийн газар анхны хуралдаанаа орос хэлээр хийхээс аргагүй болсныг тус улсын хэвлэлүүдэд мэдээлжээ. Учир нь Эрүүл мэндийн сайд гүрж гаралтай Александр Квиташвили оросоор ярихыг шаардсан байна. Засгийн газрын хуралдааны сэтгүүлчдэд нээлттэй хэсгийг Ерөнхий сайд А.Яценюк украин хэлээр явуулсан боловч хаалттай хэсэгт нь англиар ярьж эхэлсэн гэнэ. Гэвч танхимын сайд нар англи хэлнээ маруухан тул оросоор ярихад хүрсэн аж. Эрүүл мэндийн шинэ сайд нь украинаар ойлгодоггүй болох нь хуралдааны хаалттай хэсэг дууссаны дараа тодорхой болсон аж. А.Яценюк хурлаа хаалттай горимд хийх явцдаа гадаадын харьяат сайд нараасаа украинаар ойлгож буй эсэхийг нь асуухад Эдийн засгийн хөгжлийн сайд Литвийн иргэн А.Абрамовичас, Сангийн сайд украин гаралтай АНУ-ын иргэн Наталья Яресько нар “Тийм” гэсэн хариу өгсөн байна. Засгийн газрынхаа сайд нарыг гадаадын иргэдээр бүрдүүлснийг украины зарим улс төр судлаач “Удирдлага нь гадаадаас зааварчилгаа авч буйг илтгэсэн хэрэг” хэмээн үнэлсэн аж. Тухайлбал “Киевский телеграф” сонины эрхлэгч“Энэ бүх үйл явдлыг найруулж, хөгжмийг нь захиалж, бүсгүйг бүжиглүүлж буй тал санхүүг нь барихаар боллоо” хэмээн дүгнэжээ.

Д.Болд