АНУ-ын эрх баригчид Умард Солонгосын эсрэг нэмэлт хориг арга хэмжээ авахаар болжээ. Америкийн тал энэхүү шийдвэрээ Умард Солонгос “Sony Pictures” компанийн эсрэг кибер халдлага үйлдэж, кинотеатрууд руу халдахаар заналхийлсэн гэдгээр тайл-бар ласан байна. Ерөнхийлөгч Б.Обама гийн баталсан тогтоолын хүрээнд БНАСАУ-ын Засгийн газар, Солонгосын Хөдөлмөрийн намын эсрэг хориг тавихыг зөвшөөрч, 10 түшмэл, Умард Солонгосын гурван компани хориг арга хэмжээнд өртжээ. Түүнчлэн Иран, Сири, Хятад, ОХУ, Намиби зэрэг оронд ажиллаж байсан хүмүүс уг хоригт өртсөн байна. АНУ-ын эрх баригчид Умард Солонгосын талыг хакеруудыг хөлсөлж, кибер халдлага үйлдсэн гэж үзсэн боловч энэ талаар ямар нэг баримт нотолгоо олж чадаагүй. Харин Умард Солонгосын тал хакерийн халдлагад огт хамаагүй бөгөөд хориг арга хэмжээ нь үр дүнд хүрэхгүй гэдгийг мэдэгджээ. БНАСАУ-ын Төрийн тэргүүний эсрэг халдаж буйг харуулсан нь бүрэн эрхт улсын эсрэг чиглэсэн жигшүүртэй кино болохыг Пхеньяны тал мэдэгджээ. Түүнчлэн Умард Солонгосын Гадаад хэргийн яам “Sony Pictures”-ын эсрэг үйлдсэн кибер халдлагын хэргийг хамтран мөрдөх тухай хүсэлтийг нь АНУ хүлээн авахаас татгалзсаныг сануулсан байна. Пхеньяны төлөөлөгчид АНУ-ын талыг дайсагнасан бодлого явуулж, тус улсын нэр хүндийг олон улсын тавцанд унагах бодлого явуулж буйг өгүүлсэн байна. Барууны орнуудын хэвлэл мэдээллийн хэрэгслүүд, нэн ялангуяа АНУ-ын хэвлэлүүдэд Умард Солонгосын залуу удирдагчийн тухай сөрөг мэдээлэл өнгөрсөн онд тасралтгүй гарч байсан билээ. “Sony Pictures” кино компани нь “Ярилцлага” нэртэй кино хийхдээ Умард Солонгосын удирдагч Ким Чен Уны эсрэг халдлага үйлдэж байгаа тухай өгүүлсэн аж. Киног олон нийтэд үзүүлэхийн өмнө хакерууд “Sony Pictures”-ын цахим сүлжээнд халдаж, кинотеатруудад үзүүлэх үеэр халдлага үйлдэнэ хэмээн сүрдүүлсэн юм. Хакерууд халдлага үйлдэхдээ “Ярилцлага” киноны материалууд болон компанийн ажилтнуудын цахим шуудангаас олон мэдээллийг хулгайлсан аж.

Д.Болд