Европын комиссын тэргүүн Жан-Клод Юнкер Европын нэгдсэн арми байгуулахыг уриалжээ. Тэрбээр Европын орнууд нэгдсэн зэвсэгт хүчинтэй болсноор гишүүн төдийгүй хөрш зэргэлдээ орнуудад нь учирсан аюулаас хамгаалах боломжтой болно гэдгийг“Welt am Sonntag” сонинд өгсөн ярилцлагадаа өгүүлсэн байна. Жан-Клод Юнкер ийм зэвсэгт хүчнийг хурдан хугацаанд байгуулах боломжгүй боловч ажил хэрэг болсон цагт Европын холбооны үнэт зүйлсийг хамгаалах талаар гишүүн орнууд нухацтай хандаж байгаагаа Орост харуулна хэмээн үзжээ. Тэрбээр “Европын нэгдсэн арми тус холбооны гишүүн орнуудын хооронд дайн гарахгүй гэдгийг дэлхий дахинаа илтгэн харуулна” хэмээн энэхүү төслийн ач холбогдлыг тайлбарласан аж. Түүнчлэн“Сүүлийн үед Европын нэр хүнд буурснаас гадаад бодлогын хувьд биднийг тэр бүр ойшоохгүй байна” гээд энэхүү бүтэц нь НАТО-тай өрсөлдөх зорилгогүй гэдгийг өгүүлсэн байна. Жан-Клод Юнкер уг төслийг хэрэгжүүлснээр бүтэц зохион байгуулалт, санхүүгийн хувьд нэлээд ашигтай гэдгийг дурджээ. Тухайлбал, орчин үеийн зэвсэг хэрэгсэл бүтээх, худалдан авахад хамтран ажилласнаар зардал хэмнэх боломжтой гэнэ.

Д.Болд