Сьерра-Леоны дэд Ерөнхийлөгч Самуэль Сам-Сумана бямба гаригт цэргийнхэн гэрийг нь бүсэлсний дараа АНУ-аас орогнол хүсчээ. Улстөрчийн бие хамгаалагч нь эбола өвчний халдвар авч нас барсны дараа түүнийг хөл хорионд оруулсныг “Ройтер” агентлагаас мэдээлж байсан. Гэхдээ түүний гэрийг цэргийнхэн бүсэлсэн нь улс төрийн шалтгаантай бололтой. Өмнө нь эрх баригч APC намын дотоод мөрдлөгийн үр дүнгээр түүнийг сөрөг хүчний хөдөлгөөн байгуулсан хэрэгт буруутгаж, гишүүнчлэлийг нь цуцалсан гэнэ. Сьерра-Леоны эрх баригчид энэ хэргийн талаар ямар нэг тайлбар өгөөгүй аж. Өмнө нь дэд Ерөнхийлөгч сайн дураараа 21 хоногийн хугацаатай хөл хорионд орж, биеийн байдал сайн хэвээр гэдгээ мэдээлж байжээ.