Эквадорын ерөнхийлөгч Рафаэль Корреа АНУ-ын Тагнуулын төв газрыг(ТТГ) тус улсад тогтворгүй байдал үүсгэхийн тулд хорлон сүйтгэх үйл ажиллагаа явуулж буйд буруутгажээ. Эквадорт сүүлийн үед сөрөг хүчнийхэн олныг хамарсан эсэргүүцлийн жагсаал зохион байгуулж, энэ үеэр олон тооны мөргөлдөөн болсны дараа тус улсын Төрийн тэргүүн уг мэдэгдлээ хийж, сөрөг хүчнийхнийг хууль зөрчсөн үйлдлээ зогсоохыг уриалсан байна. Рафаэль Корреа ТТГ-ынхан сөрөг хүчнийхний дунд орж, эсэргүүцлийн ажиллагааг өдөөн, эмх замбараагүй байдал бий болгохыг зорьсон хэмээн дүгнэсэн аж. Түүнчлэн улс төрийн хэт барууны байр суурьтай хүчнүүд үүнд буруутай хэмээн тэрбээр үзжээ. Эквадорт 2010 онд цагдаа нар эсэргүүцлийн тэмцэлд зохион байгуулж, Ерөнхийлөгч Рафаэль Корреаг эмнэлэгт байх үед нь бүслэн хааснаас тэрбээр 10 цагийн турш барилгаас гарч чадаагүй. Ерөнхийлөгчид үнэнч цэргийнхэн маргааш өдөр нь ирж, нийслэл хотыг хяналтдаа авсны дараа Төрийн тэргүүн эмнэлгээс гарч, үүрэгт ажилдаа орох боломжтой болсон байна.

Д.Болд