Украины эрх баригчид энэ оны хоёрдугаар улиралд Оросоос шатдаг хий нийлүүлэх тухай шинэ гэрээ гэрээ байгуулжээ. Гэрээний шинэ нөхцлийн дагуу Оросын тал 1000 шоо метр шатдаг хийг 248 ам.доллараар нийлүүлэхээр болсон аж. “Бид Европын орнуудаас хий худалдан авснаас хямд буюу зах зээлийн үндэслэлтэй үнэ дээр тогтлоо. Энэхүү түр хугацааны гэрээ нь зөвхөн хоёрдугаар улиралд хамааралтай. Энэ бидэнд намар, өвлийн улиралд зориулж, шатдаг хий хуримтлуулах боломж олгож, ирээдүйн харилцааны суурийг тавина” хэмээн Украины Эрчим хүч, нүүрсний аж үйлдвэрийн сайд мэдэгдсэн байна. Оросын Засгийн газрын тэргүүн Д.Медведев энэ сарын 1-ний өдөр Украинд шатдаг хийн үнийн хөнгөлөлт үзүүлэх горимыг ирэх зургадугаар сарын 1-ний өдөр хүртэл сунгахаар болсон. Энэ оны нэгдүгээр улиралд Украинд үзүүлж байсан үнийн хөнгөлөлтийг тооцож нийлүүлсэн 1000 шоо метрийн үнэ 329 ам.доллар байв. Уг нийлүүлэлтийг өнгөрсөн оны аравдугаар сарын 31-ний өдөр Орос, Украин, Европын холбооны байгуулсан гурван талт хэлэлцээрт түшиглэж хэрэгжүүлсэн ба Украины тал өөрт шаардлагатай хийн төлбөрийг урьдчилан шилжүүлэх үүрэг хүлээсэн аж. Украин улс “Газпром”-ын нийлүүлсэн хийн төлбөрийг барагдуулаагүйгээс хийн үнэд нийт 2.477 ам.долларын өр хуримтласан байна.