Японы Окинава аралд 35 мянган иргэн цуглаж, АНУ-ын Футэмма цэргийн нисэх хүчний баазыг нутгийн хойд хэсэгт шилжүүлэх төлөвлөгөөг эсэргүүцэж буйгаа илэрхийлжээ. Арлын эрх баригчид өмнө нь тус баазыг өөр газарт шилжүүлэхийг зөвшөөрсөн боловч шинэ захирагч энэ шийдвэрийг түдгэлзүүлсэн байна. Харин Японы Засгийн газрынхан мужийн захирагчийн шийдвэрийг хууль бус хэмээн дүгнэсэн юм. Окинава мужийн төв Наха хот дахь бейсболын цэнгэлдэх хүрээлэнд болсон эсэргүүцлийн цуглаанд оролцогсод цэргийн баазыг шилжүүлэхийн оронд бүрмөсөн хаахыг шаардсан уриалга гаргажээ. Японы нутагт байрладаг АНУ-ын цэргийн байгууламжийн гуравны хоёр нь Окинавад байрлаж, тус арлын газар нутгийн тавны нэгийг эзэлдэг. Харин Футэмма цэргийн нисэх хүчний бааз нь хүн ам шигүү суурьшсан Гинован хотноо байрладаг аж. 

Д.МӨНХБОЛД