Египетийн Исмаил хотноо Суэцийн сувгийн өргөтгөлийг ашиглалтад өгөх ёслол өнгөрсөн долоо хоногт сүр дуулиантай болжээ. Ёслолд 100 гаруй орны төлөөлөгч оролцож, Египетийн иргэд бүх нийтээрээ амарсан байна. Сувгаар хөлөг онгоцуудыг хоёр тал руугаа нэгэн зэрэг зорчих боломж олгож буй энэхүү өргөтгөлийг нэг жилийн дотор барьж дуусгасан байна. Сувгийн өргөтгөлийг санаачилж зохион байгуулсан тус улсын Ерөнхийлөгч Абдель-Фаттах ас-Сиси суваг шинэчлэгдсэнээр дэлхий дахин ач тусаа өгнө хэмээн дүгнэсэн аж. Газар дундын тэнгис Улаан тэнгис хоёрыг холбосон Суэцийн сувгийг анх10 жилийн турш барьж, 1869 онд ашиглалтад оруулжээ.