АНУ-ын эрх баригчид “Royal Dutch Shell” компанид Арктикийн бүсэд газрын тос олборлох эрх олгожээ. Голланд, Их Британийн хөрөнгө оруулалттай “Shell” компанийг аюулгүй ажиллагааны стандартуудыг чанд мөрдөнө гэдэг болзолтойгоор Чукоткийн тэнгист өрөмдлөг хийж эхлэхийг зөвшөөрсөн байна. АНУ-ын мэргэжилтүүдийн тооцоолсноор Арктикийн бүс нутагт дэлхийн хэмжээнд газрын тос, шатдаг хийн одоогоор илрүүлээгүй буй нөөцийн 20 орчим хувь байгаа гэж үздэг. Гэвч байгаль орчны мэргэжилтнүүд энэ бүс нутгийн эко систем туйлын эмзэг гэдгийг хэлж, аливаа хайгуул, олборлолт явуулахыг эсэргүүцдэг юм. “Shell” компани 2012 онд Чукоткийн тэнгист өрөмдлөг хийж, газрын тос олборлохыг оролдсон боловч өрмийн тавцангаа хянах боломжгүй болсноос 18 ажилтныг нь нүүлгэн шилжүүлэхэд хүрчээ.