Иордан голын баруун эрэг болон Газын зурваст израильчууд палестин иргэдийн амь насанд халдах болсонд Палестиныг чөлөөлөх байгууллага шалгалт хийхийг НҮБ-д уриаллаа. Палестиныг чөлөөлөх байгууллагын гүйцэтгэх зөвлөлийн нарийн бичгийн дарга Себ Ерекат мэдэгдэлдээ “Израильчууд палестинчуудыг харгисаар хядсан энэ бодит хэргийг өнгөрсөн гурван долоо хоногт авсан гэрэл зураг болон бичлэгээс тодорхой харж болно” хэмээн онцлоод НҮБ-ын хүний эрхийн байгууллагад захиадал илгээжээ. Харин түүний мэдэгдлийг Израилийн тал эрс эсэргүүцэж, “Олон улсыг хууран мэхэлж, Палестин, Израилийн мөргөлдөөнийг хурцатгах шалтаг хайж байна” хэмээн шүүмжлэлтэй ханджээ.