Сэтгүүлч Л.Мөнхбаясгалангийн багийнхны бэлдсэн “Монгол дахь мүүн ажиллагаа” сурвалжлагын эхний хэсэг өчигдөр 22 цагаас “С1” телевизээр гарах ёстой байсан ч тус телевиз гаргахыг хориглосон байна. Яагаад ингэх болов гэдэг учраа жичдээ тайлбарлана гэсэн аж. Ямартай ч тэдний баг бэлдсэн нэвтрүүлгээ “Youtube” хуудаснаа байрлуулж олон түмэнд хүргэж чадлаа. Сошиал ертөнц тэр чигтээ мүүнээр амьсгалж байна. Өмнө цензургүй багийнхан биологич Т.Лхагвасүмбэрэл агсны хэргийг хөндөж далайцтай сурвалжлага бэлдсэн. Гэвч зарим хүн тус баг энэ сэдвийг гэнэт барьж авсан нь хууль цагдаагийн байгууллагынхан нэгэнт олсны үзүүрээс атгаад байсан Х.Баттулгын төмөр замын хэргийн тухай мэдээллийг дарж, ард түмний анхаарлыг өөр тийшээ хандуулах гэсэн оролдлого хэмээн хардаж байсан юм. Энэ удаа ч “Монгол дахь мүүн ажиллагаа” нэвтрүүлгийг “Хэвлэл мэдээллийн салбар дахь Женко ажиллагаа” гэж үзэх хүн байна. Учир нь Ухаахудаг-Гашуунсухайт чиглэлийн 267 км төмөр замын бүтээн байгуулалтын ажлыг эрх шилжүүлэх гэрээ нэрийн дор БНСУ-ын “Самсунг Си Ти” компанид тендергүй олгосон, “Шинэ төмөр зам”-ын бүтээн байгуулалтын төсөлд албан тушаалаа хэтрүүлэн улсад онц их хэмжээний хохирол учруулсан хэргээр УИХ-ын гишүүн Х.Баттулга, Улсын Их Хурлын даргын зөвлөх А.Гансүх нарыг шалгах үйл явц нотлох баримт бүрдүүлэх, хавтаст хэргийг хянах, мөнгөн дансны шилжүүлгүүдийг батлах үе шатандаа орсон. Энэ үед Женкогийн гэгддэг“С1” телевиз Л.Мөнхбаясгалангийн сурвалжлагыг гаргахгүй гэснээрээ сэтгүүлч бүсгүйн асаасан гал дээр тос нэмж улам өрдлөө. Харин энэ гал иргэдийн анхаарлыг татаж төмөр замын хэргийг тойрсон бамбар анхаарлаас хальж унтрах вий. 

Ч.Төмөрсүх