Цензургүй багийн хийсэн хоёр дахь сурвалжлага буюу “Монгол дахь мүүн ажиллагаа” өмнөх сурвалжлагаасаа илүү олон тооны хүнд хүрч, нийгэмд нэг том шуурга дэгдээсэн. Тус баг өмнө биологич Т.Лхагвасүмбэрэл агсны хэргийн мөрөөр далайцтай сурвалжлага бэлдэж байсан юм. Гэвч зарим хүн тус баг энэ сэдвийг гэнэт барьж авсан нь хууль цагдаагийн байгууллагынхан нэгэнт олсны үзүүрээс атгаад байсан Х.Баттулгын төмөр замын хэргийн тухай мэдээллийг дарж, ард түмний анхаарлыг өөр тийшээ хандуулах гэсэн оролдлого хэмээн хардаж байсан юм. Энэ удаа ч “Монгол дахь мүүн ажиллагаа” нэвтрүүлгийг “Хэвлэл мэдээллийн салбар дахь Женко ажиллагаа” гэж үзэх хүн байна. Учир нь Ухаахудаг-Гашуунсухайт чиглэлийн 267 км төмөр замын бүтээн байгуулалтын ажлыг эрх шилжүүлэх гэрээ нэрийн дор БНСУ-ын “Самсунг Си Ти” компанид тендергүй олгосон, “Шинэ төмөр зам”-ын бүтээн байгуулалтын төсөлд албан тушаалаа хэтрүүлэн улсад онц их хэмжээний хохирол учруулсан хэргээр УИХ-ын гишүүн Х.Баттулга, Улсын Их Хурлын даргын зөвлөх А.Гансүх нарыг шалгах үйл явц нотлох баримт бүрдүүлэх, хавтаст хэргийг хянах, мөнгөн дансны шилжүүлгүүдийг батлах үе шатандаа орсон. Энэ үед Женкогийн гэгддэг“С1” телевиз Л.Мөнхбаясгалангийн сурвалжлагыг гаргахгүй гэснээрээ сэтгүүлч бүсгүйн асаасан гал дээр тос нэмж улам өрдөөд байгаа гэлтэй. Учир нь тус телевиз “Монгол дахь мүүн ажиллагаа” сурвалжлагыг хэдийн хөтөлбөртөө оруулсан байсан ч, тодорхой шалтгаангүйгээр эфирээр цацахгүй гэсэн хариулт өгчээ. Хэдийн цензургүй баг сурвалжлагаа интернет орчинд цацаж, багагүй хандалт авсан ч сэтгүүлч Л.Мөнхбаясгалан өөрийн фэйсбүүк хуудсаар дамжуулан “Монгол HD” телевизийн удирдлагад өөрийнх нь нэвтрүүлгийг цацаж өгөх хүсэлт тавьсан. Харин тус телевиз цахим ертөнцөөр Л.Мөнхбаясгаланд “Монгол телевизийн хамт олон бид ч мөн Монгол улс дахь МҮҮН гэх үйл ажиллагааны талаар сэтгэл эмзэглэж байгаа болно. 

Энэ сэдвийн хүрээнд сэтгүүлч Б.Мөнхбаясгалан болон түүний баг “Цензургүй сурвалжлага Монгол дахь МҮҮН ажиллагаа” нэвтрүүлгийг бүтээсэн явдалд талархаж түүний хичээл зүтгэлийг өндрөөр үнэлэн дэмжиж байна. Тэрбээр өөрийн Facebook хуудсаараа дамжуулан уг нэвтрүүлгээ манай телевизээр гаргахыг хүссэн юм. Хэдий бид уг сэдвийн чухлыг ойлгож байгаа ч тус нэвтрүүлэгт дурдагдсан бүх мэдээллийг өөрийн редакцын хүрээнд нягтлан шалгалгүйгээр нэвтрүүлэх боломжгүй болно. Бид сэтгүүлч Б.Мөнхбаясгалангийн ажлыг үлгэрлэл болгон энэ талаар онцгойлон анхаарч МҮҮН-ий талаар цуврал нэвтрүүлгийг өөрийн редакцын стандартын дагуу бэлтгэн хүргэхээр тусгай ажлын хэсэг гарган ажиллахаар шийдвэрлэснээ мэдэгдэж байна. 

Монгол улсын үндэсний үнэт зүйлс дархан байх ёстой” гэсэн хариулт өгсөн. Мөн Л.Мөнхбаясгалангийн хамтрагч Э.Цэрэндолгор өчигдөр “С1” телевиз рүү очиж яагаад өөрсдийнх нь нэвтрүүлгийг гаргаагүй талаар мэдээлэл өгөх шаардлага хүргүүлж, хариулт авах гэсэн боловч тус телевиз хаалга тавиагүй. Гэхдээ түүнийг 21.00 цагт тус телевизийн “Цензургүй яриа” нэвтрүүлэгт орно гэсэн шум хэдийн тарсан, баттай болчихсон байсан. Ийн тэрбээр өдөр нь “С1”-ийн хаалттай хаалгыг мөргөсөн ч орой нь зочны суудалд заларчээ. Үүнээс гадна тэдний сурвалжлагын муу талын нэгэн дүр болох БСШУЯ-ны Стратеги бодлогын газрын дарга Б.Насанбаяр өчигдөр ажлаа хүлээлгэн өгч байгаагаа зарласан юм. Ийн хоёр бүсгүйн нийгэмд өгсөн мессеж хүчээ авч байна. Хэт их хүчээ аваад долоон сарын 1-н шиг дахин нэг хар бараан үйл явдал болох вий.

Б.Төгөлдөр