Эрүүл мэнд, спортын яам салбарын сайдгүй хагас жилийн нүүрийг үзлээ. Улс орны голлох салбар болох эрүүл мэндийн яам эзэнгүй байгаа талаар амтай болгон ярьсан боловч эрх баригчид сонсоогүй юм шиг л чихээ бөглөсөөр өдийг хүрсэн.

Тодруулбал, Эрүүл мэнд, спортын яамны сайд Г.Шийлэгдамба авлигын хэргээр баривчлагдсанаас хойш өдийг хүртэл энэ салбар эзэнгүй байна. Тэгвэл өнөөдөр УИХ-ын даргад хууль зүйн сайд Д.Дорлигжав Эрүүл мэнд, спортын сайдаар С.Ламбааг томилуулах тухай саналыг өргөн мэдүүлсэн нь олны анхаарлыг татлаа. Мэдээж энэ хэзээнээс төлөвлөсөн, тооцоолсон асуудал байсан гэдэг нь ойлгомжтой. Тэрбээр өдгөө эрүүл мэнд спортын яамны төрийн нарийн бичгийн даргаар ажиллаж байгаа салбараа мэддэг нэгэн гэгдэх боловч сар гаруйн настай сайдын суудлаар юугаа хийнэ. Төрийн нарийнийхаа суудалд л бат сууж байвал “барав” биш үү.

Өмнө нь Л.Жамбалжавыг уг суудалд суулгах асуудал яригдаад болоогүй. Тэгээд дараа нь Ц.Лхагвасүрэнг томилуулах саналыг Засгийн газрын Хэрэг эрхлэх газрын дарга С.Баярцогт өргөн мэдүүлж байсан ч, Нийгмийн бодлого, боловсрол, соёл, шинжлэх ухааны байнгын хороогоор хэлэлцэх үед гишүүдийн олонх нь  дэмжээгүй. Улмаар Ерөнхий сайд Ч.Сайханбилэг энэхүү саналаа татан  авсан. Ер нь бол Ч.Сайханбилэг  Эрүүл мэндийн яам эзгүй хэцүүдлээ гэдэг асуудал яригдахад “С.Ламбаа шиг туршлагатай хүн яаманд байгаа ш дээ” гээд байсан. Тэгвэл одоо  сонгууль тулаад ирсэн энэ үед сарын настай сайдаар С.Ламбаагаа тодруулж таарч байх шиг байна.

О.Заяа