“Баялаг бүтээгчдийн холбоо”-гоор дамжуулан чамгүй пиар хийхийн зэрэгцээ бага биш хөрөнгө зарсан АН-аас Өвөрхангай аймагт нэр дэвшигч Ч.Даваабаяр сонгуульд нэр дэвшихээс татгалзсан. Түүний гол учраа нь Өвөрхангай аймгийн Засаг дарга Д.Тогтохсүрэн байсан учраас их хөрөнгө зарж өвдөг шороодохыг хүсээгүй бололтой. Уг нь тэрбээр Хөдөлмөрийн сайдын зөвлөх нэрийн дор УИХ-ын дарга З.Энхболдыг сүүлийн жилүүдэд дагаж, “Баялаг бүтээгчдийн холбоо”-г байгуулж гээд чамгүй хөлтэй хөдөлсөн ч энэ мэт зүйлээр ард олны саналыг худалдаж авч болдоггүй юм байна гэдгийг улстөрийн ширүүн өрсөлдөөн дундаас ойлгов болов бололтой.

     Аймгийн Засаг даргаар олон жил ажиллаж нутгийн иргэдийн талархлыг хүлээсэн, Төрийн албаны дадлага туршлагатай, шударга зарчимч хүний өөдөөс Ч.Даваабаяр шиг нөхөр өрсөлдөөд нэмэргүйг хаа хаанаа мэдэж байгаа.  Д.Тогтохсүрэнгийн хувьд бол өвөрхангайчуудыг Төрд төлөөлөхөөр тодорсон өрсөлдөгчгүй нэр дэвшигч гэж болно. Харин Ч.Даваабаярын хувьд жирийн л нэг бизнесмэн залуу, түүнд Төрд ажилласан дадлага туршлага байхгүй гэхэд болно. МҮОНТ-д богино хугацаанд захирлын алба хашсан ч ажлаасаа халагдсан даруй нутаг нэгт М.Наранбаатартайгаа хэвлэлээр, шүүхээр нэг зарга үүсгэсэн гэдгийг та бүхэн санаж байгаа. Түүний Төрийн албанд ажилласан туршлага гэвэл М.Наранбаатартай зарга үүсгэсэн хугацаа гэж хэлж болно.

       МҮОНТ-д ажилласан хугацаанаасаа илүү МҮОНРТ-ын захиралтайгаа заргалдсан хугацаа давж ойчихыг та бүхэн надаар хэлүүлэлтгүй мэдэж буй. Шар бордуу хэвлэлийн зах зээлийн томоохон тоглогчдын нэг, пицца хийхээс эхлээд олон салбарт бизнес эрхэлдэг овсгоотой сэргэлэн залуу. Тийм ч учраас ямар нэгэн далдын хүч түүнийг “Чи бол Төрийн хүн биш. Бизнесээ үргэлжлүүл” гэж шивнэсэн бололтой. Гэхдээ бусдыг бодоход түүнд нэг давуу чанар байна. Тэрбээр би Д.Тогтохсүрэнтэй өрсөлдөөд хэзээ ч ялалт байгуулахгүй. Ингэж зүдэрч олсон мөнгөө салхинд хийсгээд яахав гэж бодсон байна. Үүнийг бол цэвэр мэдрэмж гэнэ. Түүнээс бус сонгуульд нэр дэвшигчдийг харж байхад мэдрэмжгүй дайрч байна. Мандат олдсон дээр нь гэдэг шиг л зүтгэж байгааг харахад инээд хүрмээр.

      Харин нэг харамсалтай зүйл нь түүнд ахиад ийм боломж олдох эсэх нь эргэлзээтэй. Сүүлийн жилүүдэд чамгүй усалж тордсон төдийгүй нутагт нь мандат өгөхөд татгалзсан хүнд ахиад ийм боломж олдоно гэдэг туйлын хүнд. Нөгөө талаар АН ийнхүү Төрийн эрхэнд байх ч уу, үгүй ч үү. Түүний ганц түшиг тулгуур болсон З.Энхболд АН-ын дарга байх эсэх нь ч эргэлзээтэй. Ерөөсөө З.Энхболд АН-ын дарга бүү хэл өөрийгөө улстөрд багтаах төдий ч зүйл болж хувирахыг хэн үгүйсгэх юм. Улстөр өөрөө ийм адармаатай. Хамгийн тод жишээ Н.Энхбаярыг хар. Аливаа улстөрийн хүчинд хэн нэгний сүүдэр болж харагдсан бол түүнтэйгээ л дуусдаг жамтай. Тэр нь өсч дэвжээд байвал өсөөд дэвжээд байна уу гэхээс унаад байвал хамт л унаад байна гэсэн үг. Тэгэхээр Ч.Даваабаярын хувьд хувийн мэдрэмжээрээ их ялагдлаас татгалзаж чадсан ч ирээдүйн улстөрийн карьераа алчихлаа гэж харагдахаар байна. 

С.Ган