Хэнтий аймгийн тойрог хоёр мандаттайгаас 41 дүгээр тойрогт, АН-аас УИХ-ын гишүүн Б.Гарамгайбаатар, МАН-аас Л.Оюун-Эрдэнэ, МАХН-аас П.Ариунжолоо, Тусгаар тогтнол, эв нэгдлийн намаас Б.Хүдэр-Ян нар өрсөлдөж байгаа бол 42 дугаар тойрогт МАН-аас Т.Гантулга, АН-аас Ж.Оюунбаатар, МАХН-аас Б.Одхүү, Тусгаар тогтнол, эв нэгдлийн намаас Н.Санжаадорж нар хүч үзэхээр зэхээд байна. Хэнтийчүүд Засаг дарга Ж.Оюунбаатартаа итгэл хүлээлгэхийн зэрэгцээ зарим хэсэгтээ талцал үүсгээд байгааг эх сурвалж хэлэв. Мэдээжийн хэрэг аймгийн Засаг даргаар ажиллаж байсан Ж.Оюунбаатарын хувьд зангараг харуулах боломж бий. Харин 41 дүгээр тойрогт нэр дэвшсэн Л.Оюун-Эрдэнэд итгэл үзүүлэх нь дамжиггүй хэмээн баттай эх сурвалж хэлсэн. Үүнийг орон нутгийн сонгогч олны хандлага, зарим судалгааны байгууллагын дүгнэлт, улстөрийн судлаачид, ажиглагчдын хандлагыг нэгтгэх маягаар хүргэж байгааг хэлэх нь зүйн хэрэг байх.

        Харин УИХ-ын гишүүн Б.Гарамгайбаатарын хувьд рейтэнг маш муу, бүр навс унасан бололтой. Учир нь тэрбээр өнгөрөгч 2012 оны сонгуульд ялалт байгуулахда ахэлж ярьж байсан зүйлээс өнөөдөр биелэсэн зүйл үгүй. Нөгөө талаар  түүний хувийнх нь компанийн тавьтсан гэх Хэнтий аймгийн Жаргалтхаан сумын нутагт орших Дуутын даваанаас Мөрөн сум хүртэлх  50 км зам нь сүүлийн хэдэн жил Б.Гарамгайбаатарыг хараан зүхэхэд хүргэсэн. Тус замаар өндөртөө чухам хэчнээн зуун хүн зорчиж өнгөрдгийг бүү мэд. Тэр бүрээр л хөөрхий гишүүнийг хараан зүхдэг. Энэ замаар зөвхөн хэнтийчүүд зорчихгүй Дорнод, сүхбаатар аймгийн зорчигчид ч дамжин өнгөрдөг. Тэр ч бүү хэл

“Гарамгай гишүүний зам ирлээ 

Гар хөлөө мэдэж яваарай

Сэгсгэр гишүүний зам ирлээ

Сэтгэл юугаа чангалж яваарай” гэх дуу хүртэл зохиосон. Ямартай ч тэрбээр дуунд мөнхөрсөн сүрхий зам бариулсан нэгэн. Энэ нь нэлээд эртнээс түүхтэй. Тухайлбал, “Насны зам” ХХК 2004 онд Багануураас Жаргалтхаан хүртэлх замыг, Б.Гарамгайбаатарын “Монроуд” ХХК Жаргалтхаанаас Өндөрхаан хүртэлх хатуу хучилттай автозамыг тавих гүйцэтгэлийг хийх болсон. Гэтэл “Насны зам” ХХК-ийн хувьд “Монроуд” ХХК-иас гурван жилийн өмнө замаа ашиглалтад оруулсан бөгөөд өдийг хүртэл замд нь эвдрэл, гэмтэл гараагүй. Харин сүүлд ашиглалтад өгсөн Б.Гарамгайбаатарын “Монроуд” ХХК-ийн тавьсан зам нэг жилийн дараагаас эхлэн эвдэрч, зам биш харин “там” болж эхэлсэн гэдэг. Монголын түүхэнд анх удаа монгол хүн өөрийг гар, өөрийн хөрөнгөөр зам барьсан нь бахархалтай. Гэвч зам нь жилийн ч насгүй байсан харамсалтай. Улсын комисс хэдхэн жилийн өмнө тууз хайчилж, чанартай хэмээн үнэлэн сүр дуулиантайгаар хүлээн авсан Б.Гарамгайбаатарын “Дуутын зам” энд тэндээсээ ховхорч, энхэл донхолоор дүүрч, машин явах эцэсгүй болсон  тухай байнгын санал гомдол үргэлжилж байсан. Үүнээс харвал УИХ-ын гишүүн болоод хийж гавьсан зүйлгүй сонгогч олондоо очих гэж байгаа түүнийг муу зам нь дэгээдээд унагах нь ойлгомжтой харагдаж байна.

А.Буурал