Хөдөлмөр, нийгмийн хамгааллын сайд Н.Номтойбаяр яамныхаа хурлын зааланд цаг үеийн асуудлаар өнөөдөр шуурхай мэдээлэл хийлээ.Тэрбээр мэдээллийн эхэнд 2018 оны нэгдүгээр сарын 01-нээс эхлэн ахмад настнуудын тэтгэврийн хэмжээг нэмэгдүүлэх болсон талаар дуулгалаа.

Ингэхдээ өндөр тэтгэвэртэй иргэдийнхийг бага, бага тэтгэвэр авдаг хүмүүсийнхийг их хэмжээгээр нэмэгдүүлж, тэнцвэртэй байлгах бодлого барих ба тэтгэврийн нэмэгдэлд 150 тэрбумд төгрөг зарцуулна гэв. Энэ мөнгийг 2018 оны Төсвийн тодотголоор оруулж ирнэ гэдгийг сайд онцлов.

Ерөнхий сайдын өгсөн чиглэлийн дагуу мэдээлэл өгч байна.  Эдийн засаг тэлж, төсвийн орлого нэмэгдэхийн хэрээр тэтгэвэр, тэтгэмж, цалингийн асуудалд анхаарах ёстой. Хөдөлмөр нийгмийн зөвшилцөл хуралдаж, хэд хэдэн зүйл заалтын хэрэгжилтийг хангах Ажлын хэсгүүд байгуулагдсан.

Мөн  цалин нэмэх асуудал яригдаж байгаа.  Хүн амын орлогын 80 хувийг бүрдүүлдэг цалин, тэтгэврийг нэмэх шийдвэр гаргалаа гэдгийг энэ хурлаар мэдэгдэж байна. Тэтгэврийг 2018 оноос нэмэхээр шийдвэрлэсэн. Дунджаар 150 орчим тэрбум төгрөгөөр нэмэгдүүлнэ. 

Удахгүй Засгийн газар 2018 оны төсвийг хэлэлцэнэ. Засгийн газар 2018 оноос тэтгэвэр нэмэгдүүлсэн байдлаар төсвийг УИХ-д өргөн мэдүүлнэ. Харин цалинг 2019 оны нэгдүгээр сарын 1-нээс өмнө нэмэх боломжгүй. Гэхдээ цалин нэмэх бодлого баримталж ажиллана. Төрийн албан хаагчдыг цомхотгон, чадавхжуулж, цалинг нэмнэ гэлээ.

                                                                                                                                                           Б.Батаа