МАН-аас Тусгаар тогтнолын ордонд хэвлэлийн бага хурал хийлээ. МАН-ын Хэвлэл мэдээлэл, олон нийттэй харилцах хэлтсийн дарга Г.Ганбаяр МАН-ын зүгээс өнөөдөр СЕХ-д шаардлага хүргүүлж байгаагаа тэд дуулгалаа.

Тэрээр “2017 оны Ерөнхийлөгчийн сонгуульд нэр дэвшсэн гурьан нэр дэвшигч зургаадугаар сарын 26-нд болсон санал хураалтаар хэн нь ч олонхын дэмжлэг авч чадаагүй. Ирэх долоодугаар сарын 9-нд хоёр дахь санал хураалт хуулийн дагуу зохион байгуулагдахаар тов нь зарлагдаад явж байна. Энэ зургаадугаар сарын 26-нд болсон санал хураалтын дүн Баян-Өлгий аймгаас хоцорч СЕХ-нд ирсэн.

Энэ асуудлаар МАХН-аас нэр дэвшсэн С.Ганбаатар Баян-Өлгий аймгийн санал хураалтын дүнд манай намыг нөлөөлсөн мэтээр мэдэгдэл хийж асуудалд хандаж байгаа. Үүнийг бид эсэргүүцэж байна. Баян-Өлгий аймаг дээр маргаан үүсгээд байгаа 35 мянган саналыг хуудсыг тоолох асуудлыг бид тавьж байгаа. Бид Баян-Өлгий аймгийн саналын хуудсыг бүхэлд нь гараар тоолох шаардлагыг СЕХ-нд хүргүүллээ” гэв.

Мөн УИХ-ын гишүүн А.Баделхан "Баян-Өлгий аймгийн сонгуулийн дүн хуулийн хүрээнд явсан. Малчид аймаг, сумын төвөөс алслагдсан газарт байдаг. Алслагдсан газарт сүлжээ байдаггүй. Сонгуулийн саналын дүн ойртож ирдэг. Сонгууль хуулийн хүрээнд явагдсан гэдгийг баталгаатай хэлье" хэмээлээ. 

СЕХ-ноос 1984 тойрог хэсгийн хороонд техникийн тооллого хийхэд саналын тоо зөрсөн тохиолдол гараагүй.Баян-Өлгий аймгийн саналын хуудсыг гараар тоолох тооллогод гурван намын нэр дэвшигчдийн албаны хүмүүсийг байлгах хэрэгтэй гэж үзэж байгаагаа дуулгалаа.

                                                                                                                                                 Б.Батаа