ЗЦА-ны Урьдчилан сэргийлэх хэлтсийн дарга, цагдаагийн хурандаа Э.Бөхбат зарим уулзварт цагдаа зохицуулалт хийхгүй болсон талаар өчигдөр мэдээллээ. Тэрбээр “Замын цагдаа замын хөдөлгөөнд зохицуулалт хийх дөрвөн удаагийн эрх байгаа. Бусад тохиолдолд зохицуулалт хийх үүрэг байхгүй. 2018 оны дөрөвдүгээр сарын 25- ны өдрөөс хойш Улаанбаатар хотын зарим уулзвар цагдаагийн биет зохицуулалтгүй болно. Үүнд, Баянгол дүүргийн Өргөө кино театр, Ахуй үйлчилгээний төв, гэмтлийн баруун урд уулзвар багтана. Улаанбаатар хотод 300 гаруй уулзвар бий. Үүний 60-70 хувьд нь цагдаа бие зохицуулалт хийдэг. Сүүлийн үеийн судалгаагаар замын хөдөлгөөнд оролцогчдын соёл сайжирч байна. Дэлхийн бусад оронд цагдаа замын хөдөлгөөнийг зохицуулдаггүй.

Манай улсад л ийм хандлага байдаг. Сахилгагүй жолоочийн хариуцлагагүй үйлдлээс үүдсэн түгжрэлийг цагдаа зохицуулах шаардлагагүй. Хөдөлгөөнд оролцохдоо жолооч нар замын хөдөлгөөний дүрмээ сайтар мөрдөх нь чухал. Иргэд замын хөдөлгөөнд оролцохдоо сахилга баттай байгаасай гэж уриалмаар байна. Манай улсад 900 мянга орчим тээврийн хэрэгсэл хөдөлгөөнд оролцож байна. Замын цагдаагийн нэг алба хаагч 1000 орчим тээврийн хэрэгсэлд хяналт тавих болчихоод байна” гэлээ. Энэхүү мэдээллийн дараа ЦЕГ-ын Мөрдөн байцаах албаны ахлах мөрдөгч, цагдаагийн хошууч Л.Цогтсайхан сэрэмжлүүлэг хүргэсэн юм. Үүнд, “Улсын хэмжээнд бүртгэгдсэн гэмт хэргийн статистикээс харахад залилах гэмт хэргийн тоон үзүүлэлт өссөн дүнтэй байна. Олны анхаарлын төвд байгаа сүлжээний гэмт хэргүүд залилангийн хэргийн дийлэнхийг эзэлж байна. Иргэдийн хувьд залилан мэхлэх гэмт хэргийн хохирогч болсон бол нэн даруй цагдаагийн байгууллагад хандах хэрэгтэй. Залилах гэмт хэргээс урьдчилан сэргийлэх арга хэмжээ тавдугаар сарын 1-нийг хүртэл явна. Залилангийн гэмт хэргээс болж 56.5 тэрбум хөрөнгийн хохирол учраад байна. Жил хүрэхгүй хугацаанд 35 мянган иргэн залилан мэхлэх гэмт хэргээс болж хохирсон” гэлээ.

Б.Саруул