АТГ Төрийн байгуулалтын байнгын хороонд гомдол гаргав
- 2018-07-23
- Улс төр
- 6
УИХ-ын гишүүн Л.Оюун-Эрдэнэ болон нэр бүхий гишүүд 2018 оны 07 дугаар сарын 10-ны өдөр УИХ-ын дарга М.Энхболдод хандаж гаргасан шаардлагын агуулгатай холбогдуулан Авлигатай тэмцэх газраас УИХ-ын Төрийн байгуулалтын байнгын хороонд хандан өнөөдөр гомдол хүргүүллээ.
Авлигатай тэмцэх газар хэрэг гомдлыг дангаараа бие даан шийдвэрлэж байгаа, улс төрийн нөлөөгөөр эрүүгийн хэргийг замхруулдаг, дарагдуулдаг мэтээр гүтгэн олон нийтэд мэдээлэх, УИХ-аас томилогддог албан тушаалтныг огцруулах, түүнийг томилсон УИХ-ын шийдвэрийг хүчингүй болгуулах шаардлага гаргах нэрээр улс төрийн дарамт, шахалт үзүүлэн, ёс зүйгүй үйлдлийг удаа дараа гаргаж байгаа тул Авлигатай тэмцэх газар ийнхүү гомдол гаргалаа.
Авлигатай тэмцэх газар дур мэдэн аливаа эрүүгийн хэрэг, гомдол мэдээллийг дарагдуулах, замхруулах хууль эрх зүйн ямар ч боломжгүй бөгөөд Үндсэн хуульд зааснаар эрүүгийн хэрэг хянан шийдвэрлэх бүхий л үйл ажиллагаа прокурорын байнгын хяналт дор явагдаж, хэрэг хянан шийдвэрлэхтэй холбогдсон аливаа шийдвэр гаргах эрх прокурор, шүүхэд хадгалагддаг. Хуульд зааснаас бусад ямар ч үндэслэлээр Авлигатай тэмцэх газрын даргыг огцруулах, чөлөөлөх эрх УИХ-ын гишүүн төдийгүй бусад хэн нэгэн этгээдэд олгогдоогүй тул дээр дурдсан үндэслэл нь хуулийн холбогдох заалтыг зөрчиж байгаа талаар Авлигатай тэмцэх газраас гаргасан гомдолд дурджээ.
Мөн дээрх үйлдлээрээ УИХ-ын гишүүн төрийн хуулийг дээдлэн сахиж, гишүүний үүргээ чин шударгаар биелүүлэхээр өргөсөн тангаргаа зөрчин, улс төрийн сонирхлоор асуудалд хандаж, олон нийтийн шударга, үнэн зөв мэдээллээр хангагдах эрх зөрчигдөж байгаа тул Л.Оюун-Эрдэнэ болон нэр бүхий УИХ-ын гишүүдийн хууль зөрчсөн үйлдлийг зохих журмын дагуу хянан шийдвэрлэж, хариуцлага тооцуулахаар Авлигатай тэмцэх газраас УИХ-ын Төрийн байгуулалтын байнгын хороонд хандлаа.
Авлигатай тэмцэх газраас УИХ-ын Төрийн байгуулалтын байнгын хороонд 2018 оны 7 дугаар сарын 23-ны өдөр хүргүүлсэн албан бичиг (2 хуудас)
УИХ-ын гишүүн Л.Оюун-Эрдэнээс УИХ-ын дарга М.Энхболдод 2018 оны 7 дугаар сарын 10-ны өдөр хүргүүлсэн шаардлага (5 хуудас)
Авлигатай тэмцэх газраас УИХ-ын гишүүн Л.Оюун-Эрдэнэд 2018 оны 6 дугаар сарын 19-ний өдөр хүргүүлсэн тайлбар (4 хуудас)
Эх сурвалж: Авлигатай тэмцэх газар
Сэтгэгдэл (6)
Шударга иргэн (122.201.23.158)
АТГ-ын дарга Энхжаргалыг огцруулах, чөлөөлнө гэхээр хужаагийн хүү хулгайч, луйварчин Энхболд, түүний хамсаатан болох 32-ын бүлэг гэх хүмүүсүүд үхэх гэж байх шивдээ. Оюун-Эрдэнэ ухарч болохгүй, тууштай тэмцэх хэрэгтэй шүү.
(182.160.33.153)
Энэ байгууллагын дарга нарыг огцруулах цаг нь үнэхээр болжээ
Иргэн (103.9.90.130)
АТГ-т 2017.11.28-нд нэгэн даргын ашиг сонирхлын зөрчлийг шалгуулахаар өргөдөл өгөөд өнөөдрийг хүртэл хариу авч чадахгүй байгаа, гэтэл Э.Идэрцогт 2018.06.26-ны Өнөөдрийн сонинд энэ асуудал шийдэгдсэн гэж худлаа ярилцлага өгч даапаалж сууна. Ингэж л ажиллаж байна ш дээ.
(150.129.140.95)
АТГ алийгаа алдаж сандарч эхэллээ. төрийн байгууллага нэг хүнийг хамгаалж хайцаалах хэрэгсэл болжээ. ийм л ёс зүйгүй хүмүүс АТГ байгаа нь бүүр аюул даа
Иргэн (202.9.41.183)
Ажлаа сайн хийхийн оронд аар саар зүйлээр хөөцөлдөх юм.!!! Цаг зав сайтай илүү хүмүүс их байдаг бололтой.
иргэн (202.179.27.42)
угаасаа л Олон нийтийн зүгээс маш их Шүүмжлэлтэй ханддаг ш дээ Олон Улсын Судалгаагаар ч тэр Монгол улс Авилгын индексээр нэлээд Байраар хойшоо ухарсан гэсэн судалгаа гарсан ш дээ Хэрвээ АТГ АТГ-ын дарга Энхжаргал ажил Албан үүргээ зохих ёсоор гүйцэтгэж Шударга ажиллаж байсан бол Дотоод Гадааддаа ч ийм Шүүмжлэлд өртөхгүй Ерөнхийлөгч ХБаттулгаас ч удаа дараалан Шаардлага Шүүмжлэл хүлээж авахгүй л байсан ш дээ