Цэргүүдийн галт зэвсэгт өртөж, нуруу нь нилэнхүйдээ түлэгдсэн бяцхан охин бусад хэдэн  хүүхдүүдийнхээ хамтаар хашгиралдан гүйх тэрхүү агшныг гэрэл зургийн хальснаа буулгасан “Ассошейтд Пресс” агентлагийн гэрэл зурагчин Ник түүнийг аварч, эмнэлэгт хүргэсэн байна. Тэрээр 1973 онд тус бүтээлээрээ сэтгүүл зүйн шилдгүүдэд олгодог Пулицерийн шагналын эзэн болсон билээ.

Биеийнхээ 65 хувьд гүн түлэгдэл авсан Ким Пак охины өдөр хоногоор үхжин, хогжруутах арьсыг сувилагч нар цэвэрлэн хуулах үед тэрээр байнга ухаан алддаг байсан гэдэг.Эмч нар түүнийг амьд үлдэх найдвар үгүй гэж байсан хэдий ч, тэрээр үхээгүй юм. Жил гаран хугацаанд эмнэлэгт тасралтгүй хэвтэж, 17 удаагийн мэс ажилбар хийлгэсний эцэст хүний ертөнцөд дахин амьдрах их хувийг олж авч чаджээ. Тэрээр “Би өөрийгөө зоригтой, хүчтэй охин, дахин амьдрах эрхтэй болсон маань хайртай гэр бүлийнхэн, бурханы маань ивээл гэж бодож, үүнээс хэцүүг давж чадсан гэж өвдөх бүртээ өөрийгөө хурцалдаг байсан.Туулж өнгөрүүлсэн амьдралаасаа өөртөө суулгасан нэг зүйл маань хүнийг уучлах сэтгэл. Эцэг эхийнхээ шүтэж, уламжлагдаж ирсэн Као Дай шашнаа орхиж, Христийн шашинд орсныхоо дараа би библийн сургаальд бичсэн“Дайснаа хайрла” гэсэн хоёр үгийг  уншаад, боломжгүй зүйл мэт санагдаж байж билээ. Би яаж өөрийг маань зовоон тарчлааж байсан хүмүүсийг уучлах юм бэ? гэж боддог байлаа. Гэвч би чадсан. Би удаан хугацаанд залбирал үйлдэж, чамгүй хичээсний эцэст, амаргүй даваа байсан өстөн дайснаа, өөдгүй нэгнийг ч уучлах зүрхтэй болсон” хэмээн тэрээр ярьсан байна.