-Муай-тай боксоор хэд дэх жилдээ хичээллэж байна вэ? 

-2009 оноос муай-тай, кикбоксоор хичээллэж эхэлсэн. Багаасаа тулааны спорт сонирхдог байсан ч хичээллэх боломж олдоггүй байлаа. Их сургуульд орсон жил тулааны спортын нэвтрүүлэг үзээд боксоор хичээллэхээр шийдсэн. Телевизээр гарч байсан зарын дагуу холбогдсоноор О.Алтанпүрэв багшийнхаа шавь болсон. Манай аав залуудаа боксоор хичээллэдэг байсан нь энэ спортыг сонгон суралцахад нөлөөлсөн байх. Одоо “Алдар” спорт хороонд харьяалагдаж тэмцээн уралдаанд оролцож байна. 

-Муай-тай боксын хотын аварга шалгаруулах тэмцээний онцлог нь юу байв? 

-Өмнө нь муай-тай, кикбоксын хотын аварга шалгаруулах тэмцээн тусдаа зохиогддог байсан. Харин энэ жилээс муай-тай боксын аварга шалгаруулах тэмцээнийг анх удаа бие даан зохион байгууллаа. Нийслэлийн тамирчдаас гадна хөдөө орон нутгаас тамирчид оролцсон. Тэмцээнийг Монголын кикбокс тулааны спортын холбооноос томилогдсон шүүгчид сонирхогчдын дүрмээр 10 онооны системээр дүгнэсэн. Мөн тамирчдыг гэмтэл бэртлээс хамгаалах зорилгоор 10 унцийн жинтэй бээлий, толгой, шүд, шилбэний хамгаалалттайгаар дөрвөн үе тулалдуулсан. 

-Сүүлийн жилүүдэд тулааны спорт сонирхон хичээллэх хүмүүсийн тоо нэмэгдсэн. Клубууд ч шинээр байгуулагдаж байна. Мөн манай кикбокс тулааны спортын холбоо орон нутагт салбараа нээснээр энэ спортыг сонгон хичээллэх хүмүүс олширсон. Тэр дундаа охид бүсгүйчүүдийн хувьд кикбокс, муай-тай боксоор хичээллэх сонирхол ихэсч байна. Үүнийг нийслэлийн муай-тай боксын аварга шалгаруулах тэмцээнээс харж болохоор байлаа. Одоо удахгүй Бүх ард түмний спартакиад болно. Энэ тэмцээний 50 кг-ын жинд өрсөлдөхөөр бэлтгэл сургуулилтаа хийж байна. 

-Энэ удаагийн тэмцээн өөрийн тань хэд дэх тэмцээн бэ? 

-Зургаа дахь тэмцээн. Өмнө нь 2010 оны Улсын аварга шалгаруулах тэмцээнээс мөнгө, муайтай боксоор алтан медаль хүртсэн. “Балтика” тэмцээний тэргүүн байрт шалгарч байлаа. Мөн өнгөрсөн онд зохиогдсон муай-тай боксын дэлхийн аварга шалгаруулах тэмцээнд оролцсон. Анхны олон улсын чанартай тэмцээн байсан болохоор их туршлага хуримтлуулсан шүү. 

-Та муай-тай боксын дэлхийн аварга шалгаруулах тэмцээнд оролцсон анхны эмэгтэй тамирчин. Хаана бэлтгэлээ базааж байв? 

-Дэлхийн аварга шалгаруулах тэмцээнд оролцохоос өмнө Таиланд уруу гурван сарын бэлтгэлд явсан. Таиландын шигшээ багийн тамирчидтай хамтарсан бэлтгэл хийсний дараа дэлхийн аваргад оролцсон. Тэнд байхдаа мэргэжлийн чансаа ахиулах хэд хэдэн тэмцээнд хүч сорьсон. Таиландын тамирчид багаасаа тулааны урлагт суралцдаг болохоор мэргэжлийн төвшинд тулалддаг. Тэднээс сурах зүйл их байсан.