Өнгөрсөн амралтын өдрүүдэд зам тээврийн ослоор нийслэлд нэг, орон нутгийн замд нэг хүн нас барсан байна. Ослын улмаас 12 хүн гэмтэж бэртсэний тав  нь бага насны хүүхэд байжээ.

Тухайлбал, БЗД-ийн нутаг Дүнжингаравын замд Toyoto Crown маркийн автомашины жолооч явган зорчигч 10 настай, эрэгтэй М-г мөргөж амь насыг нь хохироосон байна.

Монгол Улсын Замын хөдөлгөөний дүрэмд “Явган зорчигч нь явган хүний гарц буюу гармаар зам хөндлөн гарна. Иймээс явган хүний гарц руу ойртон ирсэн жолооч хурдаа хасаж, уг гарцаар гарч байгаа болон гарахаар завдаж байгаа явган зорчигчид зогсож зам тавьж өгнө” гэж заасан байдаг. Гэвч жолооч нар явган зорчигч нарт зам тавьж өгдөггүй, хурдтай явдаг зэргээс шалтгаалж явган зорчигч нар зам тээврийн осолд өртсөөр байна.

Нийт зам тээврийн осолд өртсөн хүнд явган зорчигчийн эзлэх хувь улсын хэмжээнд 81 хувьтай байгаа бол нийслэлд 93 хувийг эзэлдэг. Иймд жолооч та уулзвар, гарцан дээр хурдаа сааруулж, явган зорчигчдод зам тавьж өгөхийг Тээврийн цагдаагийн албанаас уриалж байна.

Алба хаагчдын явуулсан хяналт шалгалтын үеэр согтуугаар тээврийн хэрэгсэл жолоодсон 104 жолоочийг илрүүлэн хуулийн дагуу хариуцлага тооцжээ. 

Б.Саруул