Уругвайн цагдаа нар нийслэл Монтевидео хотын эмнэлэгүүдэд нас барсан 16 өвчтөнг хөнөөсөн хэрэгт хоёр эрэгтэй сувилагчийг буруутган баривчилжээ. 38, 49 настай хоёр эрэгтэй хоорондоо ямар нэгэн холбоогүй бөгөөд дээрх эмнэлгүүдэд сувилагчаар ажилладаг байна. Цагдаа нар өнгөрөгч нэгдүгээр сараас хойш тэднийг мөрдсөний дүнд буруутай болохыг тогтоожээ. Тэд өвчтөнүүдийг хөнөөсөн хэрэгт холбоогүй ч уг хэргийг мэдэж байсан өөр нэг эмэгтэй сувилагчийг цагдаагийн байгууллагад мэдээлэл өгөөгүй, нуун дарагдуулсан хэргээр мөн баривчилсан байна. Тус улсын хэвлэл мэдээллийн хэрэгслүүд дээрх хоёр сувилагчийг “Үхэлд хүргэгч тэнгэрийн элчүүд” гэж нэрлэжээ. Сувилагчид өвчтнүүдэд өвчин намдаах зорилгоор хэрэглэдэг хүчтэй мансууруулагч бодис морфиныг өндөр тунгаар тарих, судсанд нь агаар шахах зэргээр хөнөөсөн байна. Цагдаа нар тэднийг 16-гаас олон хүний аминд хүрсэн гэж сэжиглэж байгаа аж. Тэдний тооцоогоор 50 гаруй хүн сувилагчдын гарт амиа алдсан байж болзошгүй гэнэ. 3.4 сая хүн амтай Латин Америкийн тус улсад уг хэргийн улмаас эрүүл мэндийн салбарыг эсэргүүцсэн иргэдийн бухимдал газар авч, Эрүүл мэндийн сайд Хорхе Венегас албан тушаалаасаа огцроход хүрээд байгаа аж.