Францын өмнө зүгийн Монтобан, Тулуза хотод долоон хүнийг хөнөөсөн “дугуйтай алуурчин”-д сэжиглэгдсэн 24 настай Мохамед Мераг тус улсын аюулгүйн хүчнийхэн бүслээд байсан юм.

Францын өмнө зүгийн Монтобан, Тулуза хотод долоон хүнийг хөнөөсөн “дугуйтай алуурчин”-д сэжиглэгдсэн 24 настай Мохамед Мераг тус улсын аюулгүйн хүчнийхэн бүслээд байсан юм. Түүний орогнож байсан таван давхар байрыг аюулгүй хүчнийхэн гурван өдөр бүсэлсэн бөгөөд гурав дахь өдөр сэжигтэн байрны цонхыг хагалан үсрэх гэж байгаад амь үрэгджээ.
Тусгайгийнхан тус байрны бусад оршин суугчийг аюулгүй газарт нүүлгэн шилжүүлж, сэжигтэнтэй хэд хэдэн удаа ярилцаж бууж өгөхийг шаардаж байжээ. Харин сэжигтэн тэднийг шаардлагыг хүлээн авахаас татгалзан гар бөмбөг, клашников зэргээр галлаж байсан байна. Албаныхан түүнийг амьдаар нь барихыг хүссэн ч сэжигтний зугтах оролдлого хийхдээ гаргасан буудалцаан түүний аминд хүрчээ.
Тэрбээр тусгайгийнхан уруу гал нээн анхаарлыг нь сарниулж, нэг цонхон дээр төвлөрүүлсний дараа өөр цонхоор үсэрч зугтана гэж тооцоолсон байжээ. Гэсэн ч 200 гаруй албан хаагч бүсэлсэн байрнаас зугтаж чадахгүй юм.
 Сэжигтэн байрны нэг давхрын 1.5 метрийн өндөртэй цонхыг хагалан үсрэхдээ гартаа буу барьсан байсан ба буудсаар байсан аж. Энэ үеэр тусгайгийн олон албан хаагч түүн рүү буудсан бөгөөд бие болон толгойдоо олон удаа буудуулсан сэжигтэн газарт буусан даруйдаа амьсгал хураасан байна. Цагдаа нар Мохамед Мераг долоон хүнийг хөнөөсөн гэдгийг баттай тогтоогоогүй бөгөөд түүний ээж, ахыг саатуулаад байсан юм.
Албаныхны мэдээлснээр сэжигтний ээжийг сулласан байна. Харин ахыг нь найз охиных нь хамт үргэлжлүүлэн байцаахаар болжээ.