1896 оны дөрөвдүгээр сарын 6-ны өдөр Афин дахь “Панатинайко” цэнгэлдэхэд цугларсан 80 гаруй мянган хүний өмнө Грекийн хаан нээлтийн үг хэлснээр хүн төрөлхтний анхны их баяр наадам эхэлж байжээ. Улмаар 150 гаруй хүний бүрэлдэхүүнтэй найрал олимпийн сүлд дууг дуулсан бөгөөд хожим 1958 онд Самарасын дуу зохиогдох хүртэл олимпийн албан ёсны сүлд дуулал болж эгшиглэсэн юм. 1920 оноос олимпод оролцож буй тамирчид тангараг өргөдөг болсон бол 1928 оноос олимпийн бамбарыг бадрааж эхэлжээ. 

1894 онд хуралдсан Олон улсын олимпийн хорооны анхдугаар хур лаар шинэ үеийн олимпийн наадмыг түүхт Афин хотноо зохион байгуулах шийдвэр гаргасан байна. Энэ мэдээг Грекийн ард түмэн, хэвлэл мэдээлэл, ихэс дээдэс тухайн үедээ ихэд нааштай, талархан хүлээж авсан ч удалгүй энэ том наадмыг зохион байгуулах ажил амар биш гэдэг нь харагдаж эхэлсэн юм. 

Хэдийгээр Грекийн хаан, ханхүү Константин нар олимпийг зохион байгуулахад бүх талаар туслахаа амлаж байсан ч XIX зууны эцсээр улстөрийн хямралтай байж таарсан нь зуны анхны олимпийг зохион байгуулахад томоохон бэрхшээл болж байв. Үүнээс гадна тухайн үеийн шинээр төрсөн Ерөнхий сайд нь олимпийг зохион байгуулах шаардлагагүй гэж үзэж байсан нь ч ихээхэн хүндрэл учруулж байжээ. Гэвч хүндрэл бэрхшээлийг үл анзааран Грекийн ард түмэн хүн төрөлхтний зуны анхдугаар олимпийг амжилттай зохион байгуулж чадсан юм. Улс эх орондоо анхдугаар зуны олимпийг зохион байгуулахад Грекийн ард түмэн хандив өргөсөн нь хүн төрөлхтний бахархал болон үлджээ. Анхдугаар олимпод орсон спортын төрөл: 

1. Хөнгөн атлетик 

2. Дугуй 3. Туялзуур жад 

4. Гимнастик 

5. Буудлага 

6. Усанд сэлэлт 

7. Теннис 

8. Хүндийг өргөлт 

9. Бөх 

Анхдугаар олимпоос медаль хүртсэн улс: 

1. АНУ – 11 алт, долоон мөнгө, хоёр хүрэл 

2. Грек – 10 алт, 17 мөнгө, 19 хүрэл 

3. Герман – зургаан алт, таван мөнгө, хоёр хүрэл 

4. Франц – таван алт, дөрвөн мөнгө, хоёр хүрэл 

5. Их Британи – хоёр алт, гурван мөнгө, хоёр хүрэл