Ерөнхий сайд эрүүл мэндийн салбарынхныг бужигнуулж эхлээд хоёр хоног өнгөрлөө. Очсон газар болгондоо бараг л салбарын сайдыг нь “зодох” шахам болж хэдэн эмч нарыг бөмбөгнүүлж байна гэнэ. Түүний энэ Улаанбаатар хотдоо хийж буй “айлчлалын” хүрээнд өнөөдөр Эрүүл мэндийн яамнаас дотор, мэдрэл, арьс, сэтгэц, хоолой зэрэг арав гаруй нарийн мэргэжлийн эмч нарын багийг хорих ангиуд руу томилохоор болжээ.
   Томилох ч гэж хөхөө өвлийн хүйтэнд олигтой унаа унаш ч гаргаж өгөлгүй бараг л хөөж туух нь холгүй явуулж байгаа юм байх. Эдгээр эмч нар хорих ангиудад ял эдлэж байгаа 260 гаруй хүнд өвчтэй хүмүүст эмнэлгийн тусламж үзүүлэхээр болсон байна. Шийдвэр гарах хүртлэх хугацаанд эхний ээлжинд зайлшгүй эмчлэх шаардлагатай хүнд ялтай хоригдлуудад өрөө тасалгааг нь бэлтгэжээ. Хоригдол ч гэсэн хүн юм болохоор гаргасан шийдвэр нь зөв ч томилолтоор явж буй эмч нарынхаа яаж хэрхэн явах унаа унаш зардал мөнгийг олигтойхон шийдээд өгчихсөн бол ч яамай.