Монголын Арванбайт Боулингийн Холбооны 24 дахь удаагийн Лигийн тэмцээн Үндэсний соёл амралтын хүрээлэнгийн боулинг төвд боллоо. 2011 оноос зохиогдож эхэлсэн энэхүү тэмцээний энэ оны анхны цувралын эмэгтэйчүүдийн ангилалд лигийн аварга, 1-р зэрэгтэй тоглогч С.Хандаа/ТЭЦ-3/ түрүүлж, хошой аварга болсон бол түүнээс 6 оноогоор хоцорсон 2-р зэрэгтэй тоглогч П.Онгонсар/Би-Зон/ мөн 2 дахь удаагаа үзүүр булаав. Харин 3-р байрт 1-р зэрэгтэй тоглогч Т.Дорждэрэм/Нью бэлэг/ 7 дахиа шалгарсан байна. Эрэгтэйчүүдийн ангилалд лигийн хошой аварга, спортын дэд мастер Г.Сундуйжав/Нью бэлэг/ 175,33 дундаж оноогоор тэргүүлснээр эрэгтэй тоглогчдоос анхны 3 түрүүтэй тоглогч боллоо. Мастерын араас залуу тоглогч Э.Молор нэхсээр анх удаагаа аман хүзүүнд орж, 2-р зэрэгтэй тоглогч Н.Цэдэндамба/Страйкес/ мөн анх удаагаа шилдэг  гуравт багтжээ. Лигийн тэмцээний үеэр болсон уламжлалт “Strike’s shot” ур чадварын тэмцээнд Э.Молор түрүүлэн, 1-р зэрэгтэй тоглогч Ц.Батжаргал/Страйкес/ дахин хоёрт оров. Энэ өдрийн хамгийн өндөр оноо /211/-г С.Хандаа авсан байна. Дараагийн тэмцээн 3-р сарын 31, 4-р сарын 7-ны өдрүүдэд болох бөгөөд ХОЛБООНЫ ЦОМ-2013 “А” зэрэглэлийн нээлттэй тэмцээн ганцаарчилсан болон эрэгтэй, эмэгтэй холимог хос төрлүүдээр зохиогдоно гэж Монголын Арванбайт Боулингийн Холбооноос мэдээллээ.