Төрийн өмчит болон төрийн өмчийн оролцоотой хуулийн этгээдийн удирдах ажилтны зөвлөгөөн өчигдөр эхэллээ. Төрийн өмчийн хуулийн этгээдүүд 2016 онд 379 тэрбум төгрөгийн алдагдалтай ажиллаж байсан бол өнгөрсөн жил 859 тэрбум төгрөгийн цэвэр ашигтай ажиллаж, 12.6 тэрбум төгрөгийн ногдол ашиг төвлөрүүлсэн байна. Мөн зээлийн үлдэгдлийг 27.4 хувиар бууруулжээ. Зөвлөгөөнд Төрийн өмчийн бодлого, зохицуулалтын газрын хэлтэс, албадын дарга, ахлах мэргэжилтнүүд оролцож Төрийн болон орон нутгийн өмчийн тухай хуулийн шинэчилсэн найруулгын төслийн үзэл баримтлал, хуулийн этгээдийн санхүү, удирдлагын менежментийг оновчтой зохион байгуулахад анхаарах асуудал болон худалдан авах ажиллагааны өнөөгийн байдал, шийдвэрлах арга замын талаар ярилцлаа. ТӨБЗГ-ын Бодлого төлөвлөлт, удирдлагын хэлтсийн дарга Ц.Баяр-Эрдэнэ энэ салбарт төрийн өмчит компаниудын засаглалыг сайжруулж кодекс бий болгох, удирдлагын багийн хариуцлагын тогтолцоог сайжруулах, үйл ажиллагааны нээлттэй, ил тод байдлыг хангах, гадаад зах зээлд гарах, хөрөнгө оруулалт татах эрх зүйн орчин бүрдүүлэх гэх мэт тулгамдсан олон асуудал байгааг хэлсэн юм.

Төрийн болон орон нутгийн өмчийн тухай хуулийг 1996 онд баталснаас хойш 27 удаа нэмэлт өөрчлөлт оруулснаар хуулийн зарим зүйл, хэсэг, заалтыг хэрэглэхэд ойлгомжгүй байдал үүсч, хуулийн зохицуулалтын үр нөлөө буурсан учир зайлшгүй шинэчлэн найруулах шаардлага бий болоод буйг ТӨБЗГ-ын Захиргаа, хууль зүйн хэлтсийн дарга Э.Эрдэнэхишиг онцолж байлаа. Төрийн болон орон нутгийн өмчийн тухай хуулийг шинэчлэн батлуулснаар хуулийн зохицуулалтын давхардал, зөрчлийг арилгах, өмчийн тухай ойлголтыг эдийн засаг, нийгмийн нөхцөл байдалтай уялдуулан шинээр тодорхойлох, өмчийн удирдлагыг боловсронгуй болгох, өмчийн асуудал эрхэлсэн төрийн захиргааны байгууллага болон орон нутгийн өмчийн асуудал эрхэлсэн нэгжийн эрх, үүргийг тодорхой болгох зэрэг олон асуудлыг шийдвэрлэх боломжтой аж.

Б.МӨНХ-ЭРДЭНЭ